Kusang-loob na serbisyo, HATID AY LIGAYA AT PAG-ASENSO

Hindi inakala ni Robert Antenero-Dolleno, 55, na kahihiligan niya ang gawaing pagsasaka, maging ang magbigay ng kusang-loob na serbisyo para sa kapwa gayung lumaki ito sa Kamaynilaan na ang nakagawiang trabaho ay sa konstruksyon at pabrika.

Si Robert, o mas kilalang Kuya Robert ay tubong Negros Occidental. Napadpad ito sa Kamaynilaan upang maghanap ng mapapasukang trabaho habang nag-aaral.

Siya ay nakapagtapos ng Industrial Electrician sa isang Technical Vocational School at pinagpatuloy ang kursong Engineering habang nagtatrabaho, ngunit sa kabila ng hirap ng buhay ay hindi na nagawang ipagpatuloy pa.

Nagsimula ang hilig sa pagsasaka ni Kuya Robert nang magpaalam sa kanyang mga magulang na lalagay na sa tahimik. Nakapagtapos ng kursong Agriculture ang kanyang mapapangasawa, kung kaya’t naging tampulan siya ng tukso ng ama na baka paghawak lang ng araro ay hindi pa niya alam.

Sa kabila ng mga tukso sa kanya ng ama, ang tanging sagot lamang niya “Lahat naman po ng bagay ay natututunan, walang imposible hangga’t ang tao ay interesadong matuto.”

Taong 2001, napagtanto ni Kuya Robert na gusto niyang danasin ang buhay magsasaka. Gamit ang naipong pera sa pagtatrabaho, nakabili siya ng kalahating ektaryang lupain sa Barangay Parang, Bagac, Bataan kung saan naninirahan

ang kanyang kabiyak. “Hindi ko talaga hilig ang pagsasaka, naengganyo lamang ako kasi ang aking lupaing nabili ay magandang taniman ng palay,” aniya.

Ayon sa kanya, siya lamang ay nangangasiwa sa mga trabahador o kasama sa bukid, dahil ang namamahala nito ay hindi rin naman iba sa kanyang asawa.

Inaral niya lahat ng uri ng gawain sa bukid hanggang sa napagpasyahang tuluyan nang manirahan sa Bagac upang makasama na rin ang kanyang kabiyak na si Prima, o mas kilala bilang Ate Ema.

Si Ate Ema, 56, Agricultural Extension Worker (AEW)  sa Bagac, Bataan ay nagpatunay din sa labis na pagkahilig ni Kuya Robert sa mga gawaing pagsasaka, kaya naman isinasama niya ito kapag siya ay bumibisita sa mga barangay upang magpalaganap ng mga pagsasanay patungkol sa pagsasaka.

Mayroong 14 na barangay ang Bagac, pito dito ay baybayin na lugar na nakatalaga kay Ate Ema. Ayon kay Kuya Robert, “iyong ibang empleyado ng gobyerno, pagdating ng bagyo nagtatago sa bahay, pero ang asawa ko nasa sakahan upang tignan ang mga nasirang pananim,” buong pagmamalaki niyang pahayag.

Dahil sa mga karanasang ito, nagpasya si Kuya Robert na samahan ang kanyang kabiyak sa mga lakad nito. “Bilang asawa hindi ko siya pwedeng pabayaan,” dagdag pa niya. Hindi man linya sa kanyang

pinag-aralan ang nakahiligang gawain ngayon, hindi ito naging hadlang upang mapamahal sa napiling karera at makatulong sa kanyang kapwa magsasaka.

MAGSASAKANG KAAGAPAY NG GOBYERNO

Dahil sa kanyang dedikasyon sa pagsasaka, naitalaga si Kuya Robert bilang Farmer-Led Extensionist (FLE) ng Bagac, Bataan taong 2004. Siya ang ipinadadala sa mga pagsasanay ng Agricultural Training Institute (ATI) upang mas maipalaganap ang mga makabagong teknolohiya sa pagsasaka at maging kaagapay ng gobyerno sa pagtulong sa mga magsasaka sa kanayunan.

Mula noon, naging katuwang na ng LGU Bagac si Kuya Robert upang pasinayaan ang Farmers’ Field School o FFS sa mga karatig barangay nito.

Kwento nito, ang layunin ng isang Farmer Led Extensionist na ngayon ay Local Farmer Technician (LFT) na kung tawagin ay maging katuwang ng mga AEW sa pagpapalaganap ng mga makabagong pamamaran ng pagsasaka.

Aniya dahil sa mga naging karanasan sa LFT, natutunan niya ang kababaang-loob sa kapwa magsasaka. Bagamat siya rin ay isang magsasaka na maituturing, danas din niya ang hirap lalo na kapag ang sakahan ay napipinsala ng kalamidad.

Kaya naman ganun na lamang ang kanyang pagsisikap na maibahagi ang mga natutunan sa pagsasanay sa kanyang kapwa magsasaka upang mas madagdagan pa ang kaalaman at mga diskarteng aalalay sa kanila sa tamang pagsasaka.

“Kung anong ganda ng turo, anong ganda ng iyong pinulot sa iyong natutunan kung itoy mananatili sa bulsa mo ay hindi lalago, pero kung pagbalik mo sa iyong lugar at ito’y binahagi mo sa kapwa mo magsasaka tiyak na iyon ay lalago sabay sa paglago ng ani ng kapwa mo,” diin ni Kuya Robert.

“Hindi man sapat kung ano man yung natatanggap namin, kinahiligan ko na ito na tumulong sa aking kapwa

magsasaka. Sa panahon ngayon, walang imposible kung tayong mga magsasaka ay tulong-tulong, sapagkat ang sarili at kapwa din natin ang makatutulong sa atin,” dagdag pa niya.

“Mahusay magturo si Kuya Robert, marami na kaming natutunan sa kanya sa pagsasaka,” patotoo ni Hernani Fruelda ng Barangay Binuwangan, isa sa mga nabigyang serbisyo ni Kuya Robert.

Bilang lider ng Duhat Upland Farmers Association, Inc. si Hernani ay patuloy na umaasa na marami pang maibabahaging kaalaman si Kuya Robert sa kanila upang mas lalo nilang pag-igihan pa ang pagsasaka at tapusin ang programa ng FFS sa kanilang lugar.

KATAS NG BOLUNTERISMO

Taong 2015 nang maging opisyal na kabahagi siya ng munisipyo ng Bagac sa ilalim ng municipal

agriculture office.

Sabi nga ng iba, ang kusangloob na pagbibigay serbisyo ay isang paraan ng paglilingkod at pagpapakita ng pagmamahal sa kapwa at sa lipunan nang walang hinihintay na kapalit.

Hindi man hinangad ngunit kusang ibinigay ang pagkakataon kay Kuya Robert na suklian ang kanyang pagpupunyagi na mapabilang na maging kawani ng gobyerno. Para sa kanya, kasiyahan na niyang maglingkod sa kapwa.

Minsan sa kanyang pagpapasinaya ng FFS, kinakitaan siya ng mayor ng Bagac ng abilidad na maimpluwensyahan ang mga magsasaka sa tamang paggamit ng mga teknolohiyang makatutulong sa gawain sa bukid at maitaas ang moral ng mga magsasakang upang mas pag-igtingin pa ang pagsasaka.

Ayon naman kay Ate Ema, “minsan po sa opisina, si Robert nalang ang laging hinahanap. Mas kilala na po si Kuya Robert kesa sa amin dito na matagal nading naninilbihan sa agriculture office.”

Patunay lamang ito sa magandang relasyong nabuo ni Kuya Robert sa kapwa magsasakang umaasa at nagtitiwala sa kanyang kakayahan.

At nito lamang nakaraang Mayo taong 2017, siya ay pinarangalan bilang isa sa mga Natatanging Local Farmer Technician sa Pilipinas na iginawad sa Clark, Pampanga. Kalakip ng parangal na ito ay cash incentive na nagkakahalaga ng Php20,000. “Masarap sa pakiramdam na gawaran ng isang parangal na katulad nito, yung hirap mo ng ilang taon ay nagbunga. Sabi nga

nila, naghirap ka man at least may na-ani tulad ng pagtatanim ng halaman,” saad niya.

PAGPAPATULOY NG NASIMULAN

“Masasabi kong ito ang calling ko. Noong una’y wala talaga akong hilig sa pagsasaka, pero noong ito’y nakagawian ko na, ayoko ng ihinto. Sabi nga nila may edad na ako. Ang sabi ko naman wala ‘yan sa edad, kung mahal mo ang ginagawa mo ipagpapatuloy mo ito hangga’t may nangangailangan,” ani Kuya Robert.

Malaking hamon man kung titingnan ang bigat ng responsibilidad na kanyang pasan, ipagpapatuloy ni Kuya Robert ang kanyang nasimulan. Dagdag pa niya, “Hangga’t kailangan po ang serbisyo ko ng mga kapwa ko magsasaka, hindi ako magsasawa.”

Aminado si Kuya Robert na marami pa ring taliwas at sarado

ang pag-iisip pagdating sa makabagong pamamaraan ng pagsasaka, ngunit ang mga salik na ito ang siyang nagpapaigting sa kanya upang mas lalo pang mahalin ang kanyang gawain.

“Ang sabi ko sa kanila kung ano ang natutunan niyo noong unang panahon at iyong natutunan ko sa kasalukuyan bilang LFT, hindi natin dapat pagtalunan iyan. Kung ano man pong dulot at ganda ng inyong natutunan noon at saka yung ganda ng natutunan ko sa mga pagsasanay, pagsamahin po natin. Baka sa key check na walo, pwede nating gawing siyam,” ani Kuya Robert.

Bitbit ang mga pangarap at pangakong layunin bilang isang LFT, si Kuya Robert ay hindi maglilikat ang pagmamahal sa napiling karera at pagmamalasakit sa kapwa magsasaka at dahil na rin sa labis na kaligayahang nasumpungan sa napiling tungkulin.

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

w

Connecting to %s